Laxinn að raða sér í árnar
Frá Flóku. Þessi mynd er frá Jóhanni Ragnarssyni
Við höfuð greint frá því að laxinn hefur gengið snemma í ár og opnunartölur í Blöndu og Norðurá staðfesta það. Hér er meira af sama meiði, Flóka, Laxá í Leir o.fl.
Eins og svo oft áður, fengum við skemmtilegan póst frá Hjálmari Árnasyni, einum af hollvinum VoV. Hann er mikill aðdáandi Laxár í Leir og Flóku og hann gat ekki á sér setið undir öllum þessum fréttum af snemmgengnum löxum og fór í bíltúr...Hjálmar hefur orðið:
„Þakka ykkur enn og aftur fréttir af gangi mála. Spennan vex með hverri frétt af nýrri á sem „dettur“ inn. Að sama skapi vex óþolið og tilhlökkunin í fyrstu ferð sumarsins. Löngu búið að fara nokkrum sinnum yfir veiðigræjur, fá flugurnar frá dr. Jónasi, yfirfara línur, tauma og allan búnað. Allt til reiðu en óþægilega langt í fyrsta túr sem verður að vanda í frú Flóku í Borgarfirði í lok þessa mánaðar. Til að lina þjáningarnar og slá á óþolið ákvað ég að skreppa í Borgarfjörðinn í morgun(sunnudag) – ekki til að veiða heldur kanna hvort hann væri kominn í Flóku sem verður reyndar ekki opnuð fyrr en eftir tæpar tvær vikur. Fékk í lið með mér annan sjúkling, Árna Geir Pálsson.
Byrjuðum á að kíkja í Leirársveitina enda Laxá í Leir. ein af hinum yndislegri. Brá reyndar við vatnsleysið – sjaldan séð þessa elsku jafn rislága. Á hefðbundnum stað (í vikinu á móts við steininn) lá einn nýgenginn og beið greinilega eftir félögum sínum – pollrólegur í brakandi blíðunni. Ókum inn Svínadalinn, kíktum á Miðfellsfljótið, Eyrafoss og Breiðuna – bara ti lað auka væntumþykjuna fyriur þessari dásamlegu veiðiá. Haustið verður skemmtilegt að vanda.
Og komum svo að frú Flóku. Beint í gljúfrið, á pallinn yfir „flata steininum“ og sjá - hann er mættur. Á hefðbundnum stað, móts við þann flata tifaði sporður, skömmu síðar renndu tveir sér upp rennuna og lögðust, enn einn í holunni við útfallið hjá flata. Á Pokabreiðu mátti greina fyrst einn, svo annan og um síðir höfðum við barið augum allt að 10 fiska á Breiðunni og Gljúfrinu. Enginn í Hundsfossi, líklegast allir undir fryssinu, en einn spegilfagur í rennunni ofan Rangs. Flóka tilbúin að taka á móti veiðimönnum. Veit ekki hvort verðin varð til að róa hugann....fjandi langt í fyrsta túr.“
Áskorun...
Takk fyrir þetta Hjálmar og viljum við gjarnan benda á að þetta er gapandi dæmi um hversu góður vefurinn okkar getur verið þegar lesendur okkar sinna honum. Endilega sendið okkur efni kæru lesendur.