Ljósmyndasamkeppnin: Nokkrar leiðbeiningar
Einar Falur Ingólfsson ljósmyndari við opnun Norðurár 1.júní síðast liðinn. Mynd Heimir Óskarsson.
Nú má segja að hásumri sé tekið að halla og þar með styttist heldur betur í annan endann vertíðarinnar. Ljósmyndasamkeppnin okkar stendur nú yfir og er góð gróska í henni. Myndir bíða birtingar og stöðugt berast nýjar. Annar dómnefndarmanna okkar er landskunnur atvinnuljósmyndari, Einar Falur Ingólfsson á Morgunblaðinu og hann tók sig til í vikunni og dró saman nokkur atriði sem hafa ber í huga þegar tekin er góð veiðiljósmynd
Einar tekur nú við: Við veiðar í dag má segja að myndavél sé orðin (allt að því) jafn mikilvægt tæki og veiðistöngin. Ekki síst þegar veitt er á svæðum þar sem skylt er að sleppa fiski. Þeir sem það gera þekkja nefnilega flestir þá tilfinningu að þeir þurfi að sýna bráðina. Það er líka ástæðan, að margra sögn, fyrir því að þeir drepa bráðina; ekki að fæðuöflunin sé svo mikilvæg heldur hitt að þeir vilja sýna árangur. Myndirnar gera einmitt það, þær sýna það sem veiðimaðurinn og félagar hans veiddu.
Margir mæta til veiða með stórar og dýrar vélar, með miklum myndgæðum. Aðrir hafa einfaldari vélar sem lítið fer fyrir og svo eru líka fleiri og fleiri sem eiga síma sem taka myndir í hreint ágætum gæðum. Og það má ekki gleyma því að það er hægt að taka góða mynd á hvaða myndavél sem er - þar er nefnilega hugsun ljósmyndarans sem skiptir mestu mál.
Þrír af þeim þekktustu að störfum, Golli á 24 stundum og Einar Falur á Mogganum eru uppteknir af fluguboxi formanns SVFR, en Gunnar Bender á Sportveiðiblaðinu hefur fundið annað myndefni inni í skóginum við Norðurá 1.júní sl. Mynd Heimir Óskarsson.
Góð myndavél er ekki ávísun á góða og forvitnilega ljósmynd, heldur afstaða og ákvarðanir þess sem heldur á vélinni.
Ágætt er að hafa nokkrar "reglur" í huga (meðvitaður um það að reglur eru til að brjóta þær...):
- Stillið myndavélina á mestu gæði, stærstu skráargerðina. Það er alltaf hægt að minnka skrána eftirá, en það er ekki hægt að stækka mynd í lélegri upplausn ef áhugi er á því að stækka hana upp, birta hana í tímariti eða bók.
- Alltaf er gott að hafa í huga kennisetningu hins fræga stríðsljósmyndara Roberts Capa: Ef myndin þín er ekki nógu góð, þá ertu ekki nógu nálægt! Með öðrum orðum: á myndinni á ekki að vera neinn óþarfi, ekkert sem á ekki að vera þar. Girðingarstaura, bílastæði, landið og miðin er óþarfi að sýna þegar á að sýna veiðimann; vandið innrömmuna - alltaf. Vel innrömmuð mynd er forvitnileg og fangar augað.
Það er um að gera að skrá minningarnar. Mynd gg.
- Til að búa til forvitnilegan myndramma er gott að nota aðal tæki ljósmyndarans, sem er ekki endilega myndavélin heldur fæturnir! Gangið í kringum myndefnið, finnið besta sjónarhornið. Og beygið ykkur niður. Það getur komið á óvart hvað það gefur skemmtilegri sjónarhorn en þegar staðið er uppréttur. Alls ekki mynda niður á veiðimann sem krýpur með fisk, beygið ykkur niður í sömu hæð og hann.
- Ekki mynda bara fólk með fiska. Reynið líka að taka forvitnilegar myndir þar sem náttúran og veiðimaður verða eitt. Og reynið líka að vera frumleg í ljósmyndunni, það getur verið skemmtilegt.
- Það er full ástæða til að eiga góðar ljósmyndir úr veiðiferðum; myndir staðfesta minningar - og geta enst lengur en fiskarnir...
Góða skemmtun í veiðiferðinni!, Einar Falur Ingólfsson
.JPG)
