Hávísindaleg stangarprófun VoV á Nielsen Powerflex!
Stórar bleikjur sem Powerflexinn afgreiddi með miklum sóma. Mynd gg.
Við tókum uppá því í vor að skrifa umsögn um umtalaða veiðistöng frá Hardy. Nú stígum við annað skref í sömu átt og skrifum um aðra ekki minna umtalaða stöng, Nielsen Powerflex sem var m.a. kjörin ein af þremur bestu kaupunum á eyrinni í flokki nýjunga á síðasta ári af þekktu bresku stangaveiðitímariti.
Það ber að árétta það sama og forðum, er við skrifuðum um “hina” stöngina, að sérfræðing telur ritstjóri sig ekki vera, en hann er his vegar fullfær um að skrifa hvað honum finnst eftir að hafa meðhöndlað gripinn, sem hann gerði við misjafnar aðstæður á dögunum.
En hvað með Nielsen Powerflex? Þetta er íslensk smíð og einhverra hluta vegna hafa einhverjir verið að úthúða Nielsen á spjallþráðum stangaveiðimanna. Sagt þær brotna. Ritstjóri fór með opnum hug í þessa stangarprófun, vitandi viti sínu um að hann hefur sjálfur komið heim með brotnar stangir sem hétu frægari nöfnum en Nielsen.
Nielsen Powerflex.
Stangir brotna og kemur þar margt til, m.a. að menn eru að þjösna þeim út með ýmsum hætti og þær verða fyrir hnjaski. Það er ekki flóknari en það og flestir alvöru stangarframleiðendur hafa lífstíðarábyrgð á stöngum sínum. Það gera Nielsenmenn einnig.
Sigurður Þórsson hjá Nielsen sagði okkur þegar við sóttum Powerflexinn til hans, að honum sýndist að Nielsen væri algerlega komin til að vera, salan væri svo góð að hann tryði því vart að aðrir væru að selja jafn mikið af öðrum merkjum. “Við höfum verið að þróa okkur áfram með þessar stangir og uppskerum skv. því. Þær eru smíðaðar í Kína af fyrirtæki sem hefur 15 ára reynslu og við erum búnir að fara margar ferðir utan til að leggja hönd okkar á hönnunina og koma á framfæri þeim eiginleikum sem stangir þurfa að hafa til notkunar á Íslandi. Þetta eru tæknimenn sem vita sínu viti og með okkur hefur tekist góð vinátta og góður trúnaður.”
En hvað gekk ykkur til.....að framleiða stangir undir nýju merki þegar allt er fullt af gæðastöngum?
“Jah, það er stórt spurt,” segir Sigurður, og heldur áfram: “Sko Sigurður Þórsson er enginn stangarsmiður, en við vorum með hugmyndir um hvernig við vildum hafa flugustangir, ekki endilega skv einhverjum íslenskum aðstæðum, því víðast eru þetta sömu aðstæðurnar, vindur, rigning, kuldi osfrv...en við vorum bara að hugsa um að hafa alla bestu fítusana í einum pakka og koma honum til veiðimanna á sem bestu verði. Þar skilur kannski á milli okkar og annarra, þ.e.a.s. verð fyrir gæði. Öll þessi frægu nöfn eru náttúrulega ekkert nema gæðin, en gæðalega erum við fullkomlega sambærilegir, en verðin okkar eru miklu lægri sem helgast af því að það eru engir milliliðir á milli okkar og framleiðandans. Það munar 10 til 20 þúsund krónum í verði stangar útúr búð og munar um minna.”
Þetta eru öflugar stangir.
En hvað með þessa neikvæðu umsögn sem Nielsen er stundum að fá?
"Ég skal ekki segja. Það kemur upp af og til eitthvað á spjallþráðum og ég held helst að þetta sé alltaf sami einstaklingurinn og einhver öfund kunni að vera á bak við þetta. Þetta er náttúrulega hvimleitt, en hvað getur maður sagt. Stangirnar tala bara einfaldlega sínu máli. Við erum með hóp sérfræðinga sem nota stangirnar okkar við allar þær aðstæður sem upp koma. Þetta eru Þór Nielsen, Benedikt Helgason, Ríkharður Hjálmarsson og Jón Þór Júlíusson, allt þrautreyndir stangaveiðimenn á öllum sviðum. Jón Þór veiddi t.d. 170 laxa í fyrra á tíu feta Powerflex áttuna og misbauð henni hrikalega að eigin sögn. Aldrei gaf hún eftir og alltaf vann hún sína vinnu.
Þá að stönginni. Verðlaunastöngin er Powerflex fyrir línu 6, en við óskuðum eftir Powerflex fyrir línu 8 því okkur langaði að prófa “lurk”. Þetta er stöng í fjórum hlutum og ef menn eru fíknir í fallega liti, þá er það kannski galli við stöngina að hún er brún! En satt best að segja fundum við ekki öllu mikið meira að þessari stöng.
Haldið var uppí Langá á Mýrum og veðrið var heldur leiðinlegt, strekkingur úr vestri og stóð oftast upp eftir ánni sem er náttúrulega afleitt fyrir rétthentan kastara. Stundum var vindurinn beint í smettið, og einu sinni beint í bakið sem olli því m.a. að kortér fór eitt sinn í að losa fluguna úr öðru herðablaði veiðivestisins, en það var ekki Nielseninum að kenna. Einhverjir fuglar á spjallrásum hefðu eflaust fundið stönginni því til foráttu, en við kenndum vindinum um.
Nielseninn fyrir átta er öflug stöng. Algjör vinnumaur og þó að um þungt outfit sé að ræða þá er stöngin eigi að síður nett, næm, létt og meðfærileg. Og samt sem áður geysilega hröð og öflug. Í þessum leiðinlega hryssingi lagði hún línuna snilldarlega út. Ekki fékk hún að kljást við lax og var því fengið leyfi til að fara “fram á Fjall”, þ.e.a.s. upp fyrir svokölluð Ármót Langár og Gljúfurár, en þar býr mjög væn og öflug fjallableikja. Ekki stór stofn, en þeim mun stærri fiskur svona einstaklingsbundið. Þarna fékk Nielsen Powerflex áttan verðugan mótherja, meira vestan rok og síðan fjórar stórar 3 til 3,5 punda bleikjur. Þarna höfum við oft áður fengið svipaðar bleikjur og jafnvel stærri með fimmum og sexum og það eru magnaðar glímur. Áttan fór létt með þetta og vann sína vinnu. Það er auðvelt að skilja eftir að hafa meðhöndlað þessa stöng og dregið með henni væna fiska, hvers vegna vinsældirnar fara vaxandi og ég efa ekki að sexan er enn skemmtilegri.....svo er þetta heil lína af stöngum, einhendur, tvíhendur og spanna allan línuskalann. Við erum að spá í að skoða bráðlega fimmu frá þeim hjá Nielsen og það er tilhlökkun að fenginni reynslu.
.JPG)
