Statistíkin nánast ævintýri
Mogginn var með frétt með tilvísun á baksíðu um 110 cm sjóbirting sem Arthur Galvez veiddi nýverið í Vatnamótunum. Haft var eftir Arthuri að hann hafi í fyrstu haldið að um 10 pundara væri að ræða, en er skepnan hefði strandað á eyri hefði hann hvers lags var. Hann hafi slegið á hann 13 til 14 pundum, en að hann hefði ugglaust verið um eða yfir 20 pund í betri holdum sl haust. Það var og. Þessi statistík er með ólíkindum og nánast lögreglumál að Arthur hafi ekki fargað dýrinu og komið því til rannsóknar hjá VMSt því þetta hlýtur að hafa verið einn í milljón....
Það sem gerir þetta nánast að ævintýri er, að stangaveiðimenn vita hvernig sjóbitringur vex. Samanborið við frændann, laxinn þá eru birtingar að jafnaði miklu styttri og þykkari heldur en lax. Fyrir 4-5 árum veiddi Haraldur Eiríksson hrygnu í Tungulæk að vori. Hún var 100 cm, sem sagt 10 cm styttri heldur en fiskur Arthurs. Haraldur gat ekki haldið lífi í fiskinum því hann tók oní kok og blæddi. Hann var því veginn og reyndist 11,5 kg. 23 pund. Við erum að tala um vorbirting, meira að segja hrygnu sem vantar ekki bara brennt spik frá haustinu áður, heldur alla hrognalítrana sem prýða svo aldna og virðulega hrygnu. Það er því ekki óvarlegt að ætla að hún hafi verið í það minnsta 26-27 pund haustið áður.
Frá Vatnamótunum. Mynd Gunnar Björnsson.
Hvað var þá 110 cm langur birtingur þungur haustið áður? Hætt er við að áætlun Arthurs að hann hefði verið um eða yfir 20 pund sé vægt til orða tekið, ónákvæm. Miðað við lengd er nær að ætla að hann hafi ekki verið undir 30 pundum og hugsanlega vel yfir þeirri tölu. 110 cm lax í fullum holdum er einhvers staðar á bilinu 25 til 28 pund.
86 cm sjóbirtingar að hausti hafa verið veiddir og vegnir síðustu ár og reynst um og rétt yfir 18 pund. Þegar þeir eru komnir í 90 cm þá er 20 punda múrinn rofinn. 100 cm hrygna að vori er 23 pund mínus spik og hrogn. Hvað er 110 cm britingur eiginlega í statistík?
Og Arthur er með tvo 98 cm fiska. Það hefði líka verið fínt að fá þá báða í hreisturaflestur. Þarna vantar tvo sentimetra upp á 23 punda vorfisk Haraldar er um er getið og er einn allra stærsti sjóbirtingur sem veiðst hefur hér á landi. Raunar man ritstjóri VoV ekki eftir að hafa heyrt um eða lesið um 110 cm íslenskan sjóbirting fyrr.
Þessi dæmalausa statistík vekur einnig spekúleringar um aldur sjóbirtinga, en fyrir skemmstu birtum við frétt með viðtali við Jóhanes Sturlaugsson fiskifræðing sem hafði lesið af hreistri á stórum hrygnum sem hann veiddi í klak í Tungulæk sl haust. Jóhannes sagði m.a.: "Önnur hrygnan var 80,3 cm löng og 12 ára gömul og hin var 14 ára og 86,3 cm löng. Báðar höfðu gengið sín síðustu 9 sumur í sjó í ætissleit svo sem sjóbirtinga er siður. Yngri hrygnan gekk í sjó í fyrsta sinn 3ja ára gömul og í kjölfar fjórðu sjóferðarinnar, þá 6 ára hrygndi hún í fyrsta sinn og árlega eftir það. Eldri hrygnan gekk ekki í sjó fyrr en 5 ára gömul og eftir 3ja sumar sitt í sjónum, þá 8 ára hrygndi hún í fyrsta sinn og síðan árlega eftir það. Vegna þess að þyngd hrygnanna var ekki mæld þá má geta þess til samanburðar að vænta má þess að smærri hrygnan hafi verið 10-12 pund (5-6 kg) og sú stærri 14-16 pund (7-8 kg)."
Hér er nefndur 100 cm birtingur úr Tungulæk, 23 punda.Mynd Haraldur Eiríksson.
Maður spyr sig því ekki eina ferðina enn hvað 110 cm birtingur getur hafa verið þungur heldur líka hvað hann hafi verið gamall og hversu oft hann hafði hrygnt, sérstaklega í ljósi þess að fiskar þessir vaxa mun hægar eftir að kynþroska er náð og þeir eru að ganga ár eftir ár til hrygningar. Það hefði verið mikill fengur að því að fá hreistursýni af þessum fiskum.
Það er rétt að árétta, að þessar vangaveltur eru ekki settar fram til að kasta rýrð á frásögn eða ala á tortryggni, einungis til að benda á hversu verulega einstakur atburður hér hefur verið á ferð. Mögulega allra- og langtsærsti sjóbirtingur sem veiðst hefur hér á landi....og jafnvel langalangafi þeirra allra að auki.
.JPG)
