Vissi ekki hvort hann var að koma eða fara
Stundum vita menn ekki hvort þeir eru að koma eða fara og á það við um stangaveiðimenn sem aðra. En stundum vita fiskarnir það ekki sjálfir og eru þá alveg úti á þekju. Birgir Sumarliðason var að veiða sjóbrting í Hvítá eystri fyrir skemmstu og lenti þá í fiski sem vissi ekki hvort hann var að koma eða fara.
Birgir er inn þeirra stálheppnu manna sem eiga í Iðu og er með bústað þar á bökkunum. Eru húsin á þeim slóðum sumarparadísir og ekki spillir að eigendur þeirra hafa aðgang að veiðisvæðinum goðsagnakennda, sem þó má muna sinn fífil fegri. En Birgir hefur í gegnum árin fundið nokkra veiðistaði í Hvítá þar sem hann veiðir oft sjóbirting, bæði á vorin, sem og þegar líður á sumar og haust. Þetta eru ekki Þekktir stangaveiðistaðir og við láum honum ekki að hann vill ekki deila þessari vitneskju með okkur. Hann segir enda, að þetta séu bara smápollar og bollar og stundum sé þar ekkert að hafa og stundum sé það fiskur. Nú um daginn var þar fiskur.
“Ég var með tvo Norðmenn með mér og við gistum í húsinu mínu á Iðu. Það var 4 stiga gaddur um morguninn og ég ætlaði að sofa út, en þeir voru allir á iði og vildu komast í veiði. Ég lét það eftir þeim, en við létum það vera að setja saman flugustangirnar. Spúnninn varð að duga. Í einum pollinum sem ég veit um virtist vera fullt af fiski og þeir voru alltaf að hrifsa í, en toldu illa á, hafa tekið grant í kuldanum. Við lönduðum samt nokkrum og slepptum flestum, en hirtum þrjá sem voru særðir og tókum þá heim og grilluðum. Þetta voru svona 3 til 6 punda fiskar og eins og ég sagði, þá slepptum við þessu nánast öllu. Einn var þó eitthvað tregur í það, var alveg úti að aka, þannig að þegar ég sleppti honum, snéri hann við og strandaði sér upp í fjöru. Þetta gerði hann svo aftur og ég var að því kominn að sparka honum með illu útí aftur, en sat á mér og óð með hann lengra út í staðinn. Hann reyndi að snúa við, en ég rak stígvélið þá framan í hann og lét hann þá segjast og hvarf út í ána,” sagði Birgir.
Þessi litla saga leiðir hugann að því, að bitringur er í sókn á vatnasvæði Hvítár/Ölfusár ekki síður en annars staðar og þar eru aðgengileg svæði sem almenningur hefur aðgang að og eru þekkt fyrir ágæta sjóbirtingsveiði. Má nefna Stóru Ármót sem þeir félagar hjá Lax ehf eru með á leigu og SVFR selur veiðileyfi í.
.JPG)
